Sunday, July 29, 2007

Hout kamele en kultuurgoed

Hallo almal,


Mens ry sommer so van die wit paleis af deur na die Cultural Foundation. Dis nogals vir my 'n indrukwekkende plek.
Sien die foto van die stoepe. Hier is twee groot biblioteke, maar met jaargeld van Dhs 400... R850. Kan julle julle voorstel dat ons soveel sal betaal om lid van 'n biblioteek te word?

Hulle bied allerhande klasse en vertonings aan en daar is 'n pragtige uitstal ruimte waar Suid Afrika ookal 'n uitstalling gehad het. Die foto's is tydens 'n vorige besoek geneem.


Daar was klomp van hierdie pragtig geverfde kamele toe Elriza , James en Corli Desember hier was. Ver op die agtergrond kan julle "siderman" sien. Ekskuus ek het nie nader gegaan vir die foto nie, maar het ek julle al vertel dat dit VREESLIK warm was Saterdag?

Binne is dit heerlik koel en deur die week is daar by hierdie Arabiese tent koffie en dadels. Nie Nescafe nie, Arabiese koffie. As mens nie verwag dit moet soos koffie smaak nie is die skok van die smaak daarvan nie so groot nie.
Daar is die oulikse kafeetjie vol plante en bont meubels en hulle speel die mooiste klasiek musiek terwyl mens vrugtesap of tee drink of eet teen 'n fraksie van die prys wat ons by Emirates Paleis betaal het.

Net so om die draai van die kafeetjie is 'n groot sitkamer met 'n hele klomp sitplek en soms speel iemand klavier daar. Dit het ek nog nie beleef nie en ek vermoed dis ook iets wat in die week gebeur. Daar is ook 'n groot ouditorium waar hulle musiek utvoerings hou en eenkeer 'n week kan mens van die nuutste flieks daar gaan kyk vir toegansgeld van Dhs5. Meeste van die musiekuitvoerings word deur een van die Sheikh's geborg.

Ouens, die land se vrouens kan nie 'n kleedkamer gebruik nie. Die vloere en alles is altyd sopnat. Ek sal nou nie op die detail ingaan nie, maar mens sukkel soms om neersit plek te kry vir handsakke en stuff. Kyk wat het Amelia met die goed wat sy gekoop het gedoen om haar hande gewas te kry. Annie en Corli, ons praat gereeld van hoe skoon die kleedkamers in Nieu Zeeland was.

Ek moet sê ek dink nie ek besoek die plek genoeg nie. Ek hou van die atmosfeer. Ek vertel julle volgende keer van die ete by Le Meridien ....

Groetnis tot dan









Friday, July 27, 2007

Hawens en m.... groot potte

Goeie dag

Ek het reeds vir julle vertel dat Saterdag 'n vreeslike warm dag was en daarom het ons maar liewer sommer so deur die motor venster vir Amelia die hawe se winkeltjies gewys.
Mens kan vir 'n Voortrekkerkamp se kinders koskook in hierdie potte, of hoe? Ek kan bestellings neem vir die potte maar dan moet julle dit self kom haal en reël dat dit op die vliegtuig se dakrak vasgemaak word asseblief.


Ander "deur die motorruit" stoppe was die hawe waar al die bote vasmeer wat van oral af kom, maar veral van Iran. Dis die ware wat hulle saambring wat by die winkeltjies verkoop word. Hier ruik dit nie soveel na vis nie, nee wag, korreksie... ons het nie die ruite oopgehad of uitgeklim nie, so ek kan nie sê hoe dit ruik nie en te oordeel aan hoe oorbevolk dit is, dink ek nie ek wil nie.

Abu Dhabi het die grootste vlag in die UAE en die vlag het pragtig geposseer vir Sandra se foto. Die gebou op die foto is die stad se "stadskouburg" Ek hoor dis veral Arabiese opvoerings wat daar "op die planke" kom.

Oppad na die Cultural foundation, waarvan ek in die volgende "post" sal vertel, het ons vir Amelia laat uitklim vir 'n foto by die wit paleis se deur. Hierdie was die eerste paleis in Abu Dhabi en op die oomblik staan dit leeg. Ek kan soveel potensiaal sien. Mens kan kamp daar... so baie plek en kamers en alles... Ek het nie fotos' daarvan nie, maar belowe as dit koeler is, sal ons spesiaal gaan foto's neem. Dit het my nogal laat dink aan die kamp wat ons veldkornetskap eenkeer by die Fort in Pretoria gehou het. Daardie naweek was seker een van die natstes in Pretoria. Toe ek die oggend wakker word, sien ek hoe die water van buite deur die deur stoot en opstoot na my slaapsak toe. Ek het net betyd opgestaan. Hier sal mens nie natreën nie... ek wens..



Ek praat gou weer met julle. Ek het nog so bietjei om vir julle te wys. Ek sien nou ons het einlik nogal 'n besige dag gehad.


Groetnis

Wednesday, July 25, 2007

Paleise en goue koek

Hier is ek weer,

Tee by die Palace of the Emirates hotel is iets waarvoor mens so bietjie moet spaar. Ons het elkeen 'n stukkie koek bestel, dis Dhs30 of dan R50 per stukkie.

Tee is Dhs30 per koppie, maar dan moet ek nou bysê dat die tee in 'n silwer teepotjie bedien word en dat mens twee stukkies sjokolade bykry. Nee, mens kry nie die teepotjie om te hou nie. Ter versagting moet ek noem dat die sjokolade met goue...egte 18 karaat, vlokkies gesprinkel word. Ek het nie geweet mens kan goud eet nie... en wat 'n mors. Niemand sien eers as die kosbare vraggie deur mens se binneste die pad buite toe vind nie.

Die paleis is regtig pragtig met groot oop stukke marmer vloere en tapeserië teen die trapreëling. Aan die een kant 'n nagtoneel van die hotel en aan die ander kant 'n dagtoneel.

Ek het vir julle 'n foto geneem van die venster met sy uitsig op die see. Die ruit is pragtig gesandblaas.
Ek het ook 'n foto van die dak geneem en 'n baie verontwaardige kyk van een van die hotelgaste gekry. Ek weet nie hoekom nie, ek het nie op my rug gelê om die foto te neem nie en nie gelag nie en my regtig gedra.

Vir sommige mense is die oordadige goud en bont matte bietjies te veel, maar niks kan gesê word teen die grasperke en fonteine buite die hotel nie en wat 'n ingang....

Amelia het aangebied om die tee te betaal en 'n skok gekry van 'n rekening van Dhs446. Ek dog eers sy maak 'n grap, maar nee... toe nie. Gelukkig vir haar het die kassier 'n hele sjokolade koek opgesit in plaas van die beskeie stukkie waarvan ek die foto insluit. Die koek se prys is Dhs220. Dis so R500. Die koek is kleiner as die standaard groote koeke wat ons in Suid Afrika kry. Ek hoor van skoonmakers en arbeiders in die land wat 'n skrale Dhs400-600 salaris per maand verdien.


Dis nie 'n uitstappie wat mens elke dag onderneem nie, maar so af en toe is dit darem groot bederf.

Monday, July 23, 2007

Heritage Village

Weer ekke,


Saterdag was 'n witwarm dag hier in Abu Dhabi en hoewel ons mos bietjie sight seeing gedoen het, moes ons by sekere plekke uitklim. Een so plek was by die Heritage Village. Ek was eintlik lanklaas hier, want die stalletjie langs die paadjie was vir my heeltemal nuut.Ons het strooihoede gekoop om die ergste son so bietjie af te weer... Dit help ongelukkig NIKS vir die hitte nie.Amelia moes ook haar stokkie uittoets. Die Arabiese vroue doen 'n hare dans en die mans dans met die stokkies... ja siestog, dis 'n power plaasvervanger vir 'n dansmaat ek stem saam.

Kyk hierdie tent ouens... heeltemal oop en blootgestel aan die elemente, maar daar is lugreëling. Ek neem hulle nie kwalik nie. Mens MOET probeer.
Dit lyk so koel onder die bome maar glo my vry, dis allesbehalwe. Ons het die tradisionele Arabiese boustyl gaan bewonder en onsself oortuig dat daar tog so effense luggie trek. Kyk hoe lyk 'n tipiese slaapkamer. Die kombuis sit buite. Mens moet VINNIG hol om nie gaar voete te hê voor mens in die kombuis is nie. Dit maak sin dat die mens nie wou kosmaak en vuur hê in 'n alreeds warm genoeg vertrek nie. Hulle bou nou die mooiste luukste villas deesdae, maar die kombuise is steeds buite..

Die uitsig oor Abu Dbahi en die see en selfs die Emirates paleis is pragtig van die Heritage village se strand af. Ek heg vir julle foto's aan wat taamlik onduidelik is, ongelukkig. Ek is nie 'n goeie fotograaf nie, maar die dynserigheid is as gevolg van die hitte en humiditeit. Ons kon einlik nie vinnig genoeg terugklim in die motor met lugversorging nie.

Lekker gelag vir Amelia se poging om haarself bietjie af te koel.


Op hierdie staduim het ons al ernstig behoefte gehad aan iets om te drink

Sunday, July 22, 2007

Van visplekke, paleise, Dhows en hotelle

Hallo almal,


As daar nuwe Suid Afrikaners die land inkom, is dit altyd baie lekker om hulle te laat tuis voel en net te wys waar mens wat doen en koop en eet. So moes ek byvoorbeeld leer wat suurroom in Frans is en moenie nou vra dat ek dit skryf nie, maar ek kan sê ek herken dit op die rak... totdat ek nou die dag gesien het daar is 'n etiket op die deksel geplak wat in Engels verduidelik dat dit room is met accid van soorte... maar teug na my storie, ons het Saterdag 'n heerlike dag gehad van rondry in Abu Dhabi. Ek sal so oor die volgende paar dae bietjies bietjies vertel sodat al die nuus nie op een slag op is nie.

Ons eerste stop was langs die see waar daar vissersbote vasmeer. Dis nie die hawe nie, maar hulle vang defnitief vis en dit stink!!! Dis ook waar ek eendag 'n foto van Elriza wou neem en toe loop ek agteruit teen 'n walletjie vas en slaat neer.

Teen die agtergrond van die "visplek" kan mens die Diwan van die Kroonprins sien en soos Sandra sê, dit lyk of die nuwe kroonprins 'n nuwe vleuel op elke hoek van die alreeds masiewe paleis aanbou. Ek weet regtig nie wie en hoeveel daar bly en waarvoor al die spasie gebruik word nie.


Net so om die hoek van daar af, is die plek waar hulle die Dhows bou. Ek stuur vir julle 'n foto van die "werf"... dis mos wat mens die plek noem nie waar nie? Ek het gehoor dat die Dow resies van vroeër tyd in die Arabiese geskiedenis kom toe die pêrelbote resies gejaag het om eerste terug te wees op die kaai of die hawe of die strand om die beste prys te kry vir hulle pêrels. Die tradisie het weer opgevlam en hoewel hulle nou nie meer pêrels aan boort het nie, is daar 'n jaarlikse Dhow resies met 'n miljoen Dirham prysgeld op die spel.
Oral in Abu Dhabi word nou nuwe hotelle gebou en later sal ek julle ook foto's wys van die sewester Emirates palace hotel, maar te midde van al die wonderlike luukshede is daar hierdie "hotel" langs die skeepswerf... ja, ek weet julle kyk en vra ... waar?? Ek weet ook nie, maar soos julle sien ek defnitief die bordjie.








Friday, July 20, 2007

Vorige nuusbrief

My familie en vriende,

Jinne, 'n hele volle maand is verby sedert ek laas geskryf het en ek weet nie waarheen die tyd is nie. Ek dink dit het in "overdrive" gegaan terwyl Elriza hier was. Dit was maar 'n algemene stil maand op die briewefront van almal. Elma en Nice, dankie vir die altyd gereelde briewe van julle. Is jy nie ook bietjie laat nie Nice? Ek mis die nuus en foto's oor die drie kleingoed. Sus en Hannes dankie ook vir julle mails. En Corli, dit was baie lekker om bietjie van jou te hoor. Ek het darem gesoek vir die foto's van jou op daardie website jong. Ek mis egter om van julle te hoor seunskinders.



Ek het 'n mondvol te vertel oor al die dinge wat ons aangevang het toe Riza hier was. Die warm weer het ons nie afgesit om 'n dag , of liewer, 'n uur of twee by Al Raha deur te bring nie
Die mall is ook nou oop. Ek het belowe om te vertel as dit gebeur sus, maar nog net 5 winkels is oop.Op die oomblik lyk dit na 'n "mamma" mall met die kinderklere en kruideniers en foodcourt. Lg is nog nie oop nie. O ja, daar is flieks ook. So mens kan die kinders fliek toe stuur en gaan kruideniers en klere koop as hulle nie by is om allerhande goeters in die mandjie te laai nie en hulle dan voer by die foodcourt.
Hier is nog 'n nuwe mall Al Wahda (spreek uit al whagta) oop. Daar is ook een van die Galler Belgiese sjokoladeshops Hannes. Die warm weer het ons nie daarvan weerhou om te gaan warm sjokolade drink en eet nie. Dis in elk geval, en veral volgens Riza, altyd winter in die malls. Mens kan seker so sê as dit buite 45 grade en die mall 24 grade is. Mens snak behoorlik na jou asem oor die temperatuurverskille. Dis 'n mall vir die rykes met winkels soos Banana Republic en Tommy Hillfiger... of hoe mens dit ookal spel. Ek kan in elk geval nie hulle klere bekostig nie.


Dit was so lekker om Elriza by my te hê vir haar verjaarsdag en ons het saam nogal 'n pretdag daarvan gemaak. Ons het soos ryk vrouens die dag begin met 'n pedicure en manicure. Daar was 'n tyd wat ek nie eers geweet het wat dit is nie... maar ek moet darem byvoeg dat dit steeds nie iets is wat ek gereeld doen nie. Ons middagete was koek... weliswaar wortel en beetkoek, wat baie soos wortelkoek smaak, net bietjie droeër, maar baie lekker en soet genoeg om koek te wees... soos Elriza sê.

Die aand is ons na Bennihana, waar ons vir my 50 ste verjaarsdag was Wiehann, en dis altyd 'n spesiale ervaring. Die ou het vir Elriza "Happy Birthday "geskryf met die soutpot op die "stoof" .. sien die foto's... Siende dat Riza nou swot om Pastoor te word, het ons haar ingespan om die Kinderkerk byeenkoms te lei. Sy het omtrent 'n vuurdoop gehad met een van die woeligste klomp seuntjies wat ons nog bymekaar gehad het.
Sy het 'n vingerverf aktiwiteit gekies en ons was almal aan die einde van die aand vol verf.
Sy het ook ons vroue omgeegroep se Nagmaal byeenkoms gelei. Ons het na 'n stuk uit Passion of the Christ gekyk en terwyl ons nagmaal bedien het, het Riza 'n pragtige Hillsongs lied gesing. Ons was almal bietjie tranerig, maar wat 'n wonderlike geseënde byeenkoms!!! Dit was kosbaar om daarna mekaar se voete te was voor die ete.
As julle wonder wat die jongmense tydens die uitsonderlike warm somers in hierdie land doen, kan ek julle vertel waarmee Elriza en kie hulleself mee besig gehou het. Behalwe natuurlik vir "shop"...

het hulle gaan ysskaats (sy lyk nie baie stewig op die skaatse nie)

en ten pin bowling


en weliswaar ook bietjie in die see gaan swem. Ek moet julle sê dat die seewater die tyd van die jaar 32 -33- 34 grade is. Dis soos om te bad. Mens kom met sulke rooi wangetjies en tone uit die water. Die mense sê vir my dis beter om voor ses soggens te gaan swem, dan is die water net so 30 grade... nie veel verskil nie sou ek sê. Ek is net oor een ding bly en dit is dat ek nie hier kinders in die skool het wat ek vir die DRIE maande skoolvakansie moet besig hou nie. Een van my kollegas hier sê sy stuur haar seuns op summer camp. Sy kan nog huis hou met die dogters.

Ek het heelwat lesse geleer die maand, maar die een wat my die diepste getref het is dat ons soms meer vertoue het in ons vrese as wat ons geloof het in God se Almag oor elke situasie in ons lewens. Ek het 'n rukkie gekou aan die waarheid, maar dis so waar. Ek kies om te glo. Ek weet alles werk vir ons ten goede mee.

Gedagte vir die maand:

If anyone loves me, he will obey my teaching. My Father will love him, and we will come to him and make our home with him. John 14:23

Lief vir julle almal